小朋友甲：「謝老師，一齊玩啦！」
我：「我唔得閒啊，遲啲先可以同你哋玩。」
小朋友甲：「你做乜咁唔得閒啊？你又唔駛做功課⋯」
我：「唔係架，其實我做緊功課……」（我真係做緊功課架——我收緊data嚟寫論文。）
小朋友甲：「吓！你係老師喎，駛乜做功課啊？」
小朋友乙：「咩啊，老師梗係要做功課架。佢哋本功課仲大本好多添架！」
（幼稚園既教科書有本特大版，係俾老師教書用既，有時佢哋會用白板筆示範課後練習。）
有次星期五因為要返大學，所以沒有去幼稚園。
之後的星期一，小朋友大力地拍我：「謝老師！！點解你琴日唔入嚟我哋個課室！？」
我：「琴日都唔駛返學……你有返咩？」
小朋友：「我都唔係講琴日！我係講要學口風琴嗰日啊！謝老師下次你一定要入黎啊！」
我：「呃，咁你幾時學口風琴架？」
小朋友：「唔係今日，今日著體育衫，呃，我要著校服架嗰日！」（小朋友還未有星期幾既概念）
我：「你好多日都要著校服喎……即係邊日啊！」
小朋友：「有小童軍嗰日啊！無升旗隊嗰日啊！」
我：「咁好難估喎……」
小朋友（惡）：「你係老師，唔可以估！」
兩個小男孩無聊時的對話:
甲（指身後）：嘩！有個怪獸喺呢度啊！
（甲同乙一齊轉身用手拍椅背。）
乙：哦，死佐！
甲：哦，死佐！
乙：用火燒死佢！
甲：燒死佢！
乙：俾啲水沖走佐喇！
甲：同埋頭、同埋手、同埋腳、同埋咀巴！
乙：都燒晒喇！
甲：啲牙都燒晒喇！
（其實佢哋描述到咁仔細會唔會發惡夢架？）
小男孩自己在玩的士、貨櫃車和消防車。他邊把貨櫃車撞向的士，邊配音「砰」然後的士反了車。然後，他便「Bebubebubebu…」的把消防車駛向事故現場。
兩個小女孩問：「我哋一齊玩吖好唔好啊？」
小男孩：「好啊，我要玩撞車。」
小女孩甲：「成日都玩埋啲撞死人既嘢……」
小男孩：「唔係可以玩咩喎？」
小女孩乙：「我哋玩小家庭啦。」
然後，小女孩乙把消防車塞給小男孩，說：「你做爸爸！」
小女孩甲自己拿了起貨櫃車，扮聲，向的士說：「囡囡，你做完功課咪啊？」然後繼續扮聲，向小男孩手中的消防車說：「老公，你今晚想食乜啊？」
小男孩一面無奈（正常聲線）：「我唔做老公啊…我做囝囝得唔得啊？」
小女孩甲：「咁啊，好啦，你做完功課咪啊？」
小男孩扮聲：「做完啦，我想玩撞車啊！」
小女孩乙推著的士向小男孩的消防車，扮聲說：「細佬，唔可以玩撞車架，好危險架！我哋玩小家庭啦？」
小男孩扮聲：「扮撞啫，又唔係真既，唔危險架。」
小女孩扮聲：「好啦好啦，扮架咋，你出街要小心啲唔可以周圍撞人哋架知唔知啊……」
最後，小男孩成功玩到撞車，小女孩亦都成功玩到小家庭……
（解說，因為幼稚園得好少公仔，有時女仔會用車當公仔咁玩。）
