數學堂，學生進入課室應該要開始做堂課（英國好多學校開始上堂都會有一張工作紙叫做「Do Now」，主要係幫溫返學生之前教過既嘢）。兩個男生在吵架。我提醒他們要開始工作。
學生甲：「MISS! 佢叫我做哥斯拉啊！（He called me “gorilla”）」
學生乙：「MISS! 佢叫我老虎先架！（He called me “tiger” first!）」
在旁的學生丙亂入，指著學生甲：「MISS! 佢頭先都叫馬騮啊！（ He also called me “monkey”!!）」
而我教的明明是中一不是小一啊。
又是數學堂，又是應該開始做「Do Now」。
男生甲：「我踢波勁過你啊。你咁水皮。」
男生乙：「我勁過你啊。你先水皮啊。」
男生甲：「我係ＸＸ少年足球代表隊啊，你都唔係。」
男生乙：「我屋企無錢去。有錢我都去。」
男生甲（嬲）：「哼！我有一個阿哥啊！」（唔知佢做乜忽然講阿哥）
男生乙（嬲）：「我有兩個阿哥啊！」
今次既已經是中三。呢兩個男生本身好老友，兩個都係難民（不過來自唔同國家），啲英文都係有限水平，唔係咪因為咁所以吵架都變佐小學雞。
又是數學堂——其實我超過一半時間都係支援數學科。有次教員發展日，我因為無位坐，數學組有個空位我問坐喺隔離個老師介唔介意我加入（mind if I join you），老師：「無問題，其實你幾乎係數學組（you are practically in maths department）。」
教緊畫用圓規同間尺準確地畫三角形。
我見到一個中一女生個三角形一睇就知唔係6CM（題目要求），又唔係等邊。
我：「你個三角形唔係6CM又唔係等邊喎。」
女生：「我鐘意我個三角形。6CM唔靚。」
我心稔（乜鬼嘢唔靚啊？）：「但係題目寫明係要6CM同等邊同準確地（accurately），你咁畫考試無分。」
女生：「我呢個係三角形，題目話要三角形，即係一樣，點解無會分？」
我：「我同你都係人，咁我同你係咪一樣啊？」
女生：「係啊，我哋係一樣架。」
我：「咁我哋年紀係咪一樣啊？」
女生靜佐。果然年齡係對付女仔最大既武器。
繼續係數學堂。
學生：「Miss，好唔公平啊！我乜都無做過但係俾老師罰留堂啊。」（Miss, I’ve got detention for doing nothing!）」
我：「係啊……（查電腦記錄）係啊，你真係乜都無做過喎……」
學生呆一呆，然後興奮：「係囉！好唔公平啊！」
我：「你無做功課喎。」
學生尷尬地笑。
呢度啲學生成日都會話I’ve got detention for doing nothing但係佢哋明明上堂勁嘈又或者無做功課等等。
