註：唔係講三角關係，係三角形。
利申：我間學校數學科分三級：拔尖班，普通班，同補底班。咁要我支援既學生最叻都只會喺普通班，所以我唔知拔尖班既細路有幾勁，而以下學生既數學能力並唔代表英國學生普遍既數學能力。
中四補底班數學堂
數學老師：「呢個三角形有乜特別？」(what’s special about this triangle?)
學生：「佢有角。」(it has angles)
數學老師：「三—角—形，字面解都已經係三隻角，所以唔係呢個三角形特別既地方。」(It’s tri-angle, which literally meant three angles. So this isn’t what is special about this triangle.)
全班學生一臉茫然。
老師等佐一陣，用白板筆沿注個直角劃，俾貼士學生答。
學生：「佢有一個正方形。」(it has a square)
中一普通班數學堂
數學老師教完以下既直角三角形（right angle triangle）：
之後工作紙上出現以下呢個三角形：
我個學生寫：left angle triangle. 😅
數學題計有幾多粒朱古力豆，學生計到小數。
我：「你覺唔覺得個答案有問題呢？」
學生：「唔……唔知喎……」
我：「我哋計緊乜嘢啊？」
學生：「唔，有幾多粒朱古力豆囉。」
我：「咁你個答案會唔會唔make sense?」
學生：「唔…………（十秒）」
我：「咁有小數點即係點啊？」
學生：「啲朱古力豆碎佐？」
數學題「湯馬士嗰班有三十人，湯馬士話佢嗰班男女比例係一比三。試解釋點解湯馬士一定係搞錯佐啲嘢。」
學生坐喺度發呆。
我：「你稔緊乜嘢？」
學生：「我唔知湯馬士搞錯乜嘢啊。」
我：「咁你試下計湯馬士嗰班有幾多個男仔？」
學生：「三十除四等於7.5……唔，咁之後點啊？」
我：「你會唔會覺得7.5個男仔有啲奇怪？」
學生：「唔？唔知啊。」
我：「呃，如果我話我哋呢度有半個男仔（a half boy）你覺得係代表乜嘢？」
學生稔佐一陣：「咁係無可能架喎？唔知代表乜嘢啊……」
我：「係啊，無可能架，但係湯馬士講既嘢就係話佢嗰班有七個半男仔喎……你記唔記得呢條題目問緊乜嘢？」
學生終於恍然大悟：「係喎，因為無可能有七個半男仔，所以湯馬士搞錯，咁容易架！」
仔，你稔佐好耐，唔好乜都加容易喺後面好唔好？
（好多仔成日都話that’s easy，但係佢哋根本就唔識，呢種學生先係最難教／最難搞，因為佢哋連自己唔識乜嘢都唔知。）
呢段可能要有中一數學程度先完全明白發生乜事：
老師教緊中四 y = mx + c，然後有條題目係 y = x + 1，問y-intercept 個坐標係乜。
老師例晒式喺白板，之後有個學生舉手問：「老師，個圓圏喺邊度黎架？（sir, where does the circle comes from?）」
老師望住佢寫既答案(0,1)，問：「乜嘢圓圈？」……
我指住佢寫個答案個０字。
老師：「呃嗰個係０……所有y-intercept既x都係０……」
