Member-only story
有少少搞笑或者勞氣（大學篇）
有個學生落堂後想問功課，因為我連堂tutorial，要喺五分鐘內set up下堂嘅教材，所以就約佐佢第二日嚟office傾。
第二日，我喺office等佢，有個學生入嚟想問問題。
我：「我淨係可以答你幾分鐘咋，因為有同學約佐依家，應該就到，我要答佢先……一係你遲半個鐘嚟？」
佢：「咁我半個鐘之後嚟啦。」
半個鐘之後，個學生返嚟。
我：「早知頭先答你啦，嗰個琴日約佐我嘅同學無嚟……」
佢：「其實我琴日都有約你㗎……」
我：「吓？你琴日係咪有戴眼鏡同埋紮佐馬尾？」
佢：「係啊！」
我：「唔好意思啊，你無戴眼鏡我唔認得啊。你頭先做乜唔講你約佐我啊？」
佢：「我以為你約佐另一個學生吖嘛。」
（我認人超級差⋯⋯）
學生甲：「Reading week係咪唔駛上堂啊？」
我：「唔駛上tutorial，不過記得要上lecture同要交report喎……」
學生乙：「好奸啊！！」
有個學生tutorial遲大到，我趁其他同學做緊exercise問佢跟唔跟到，跟唔到可以上之後嗰堂（我連續教兩堂），點知佢發脾氣：「根本一直都唔X明做緊乜野，上lecture又唔X明，上tutorial又唔X明⋯⋯」（X = Fk.. 佢係韓國人，講英文。）
我等佢發洩完，話：「你如果有唔明可以consultation hour搵我。差唔多做完exercise，要繼續上堂。」
傾exercise問題，一如既往，無人主動回應。其實好正常，學生通常都要幾秒先會有反應，同埋一定要叫名先會答。
佢見無人答就大大聲講：「你睇，無人答你啊，根本無人明！」
全班dead air兩秒，然後難得地有幾個學生舉手。（我有少少感動，因為真係第一次有人主動舉手。）
好多學生email當whatsapp，成個電郵得一句問題，無署名，Email ID又唔係名（如u68968968），搞到我好想回Dear u68968968。
上完第一堂tutorial，check email，有人send佐好多個urgent email，subject仲要係help!!! 原來係一個學生問我喺邊度上堂，仲要寫：我知你可能上緊堂睇唔到呢封email，但係我搵唔到個課室喺邊，help!!!
學生（恐慌衝入課室）:「 我琴晚submit錯佐功課啊！！」
我：「吓？你無睇我封email咩？」 （因為好多學生交錯功課，所以我email佐全部學生，提佢哋應該交邊份，同check下自己有無交錯。）
學生：「我有睇啊，我仲稔『邊個會咁白痴交錯功課』，所以我無理到。」
