有少少慘:串錯一個字都唔得😟

思然 oce
4 min readMay 11, 2018
“A lego figurine sits on the floor below a shoe, which threatens to crush it” by James Pond on Unsplash

早幾日個傻的媽,令我稔返幾年前收數據時遇到的一個幼稚園小男孩Fred(假名)。

我是由 K1上學期開始觀察Fred,他很喜歡笑,很活潑,對同學友善,到K2,佢好叻仔,見親我都會好興奮咁同我講好多嘢,試過背一大堆恐龍名俾我聽。K3最後一次觀察,佢個樣好多時都有啲累,間唔中會「打喊露」,但都仲會搵我講嘢。

過佐兩個月之後,我返去幼稚園搵老師收問卷,佢雙眼無佐神彩,個樣好累,佢啲同學仔同我揮手,佢望一望我,但係完全無打招呼。我問老師阿Fred做乜好似咁累,老師話佢呢排都係咁,可能係要去interview掛。

放學時間,我經過校車隊,Fred拉一拉我:「我講啲嘢俾你聽吖。」
我蹲下:「乜嘢啊?」
Fred細細聲講:「我媽咪買佐好大盒Lego俾我啊⋯」
我都細細聲(排緊隊搭校車唔可以傾偈):「嘩,咁你咪好開心!」
Fred擰頭:「唔係啊⋯⋯佢話要我依個月所有記憶遊戲(即係默書)都要一百分先可以開啊!好難啊!真係無可能啊!依家第三個星期啊!」
我:「吓!咁真係好難喎⋯⋯」
Fred擔心:「我啱啱應該無錯既,應該無錯既⋯⋯我溫佐好耐架⋯⋯快啲五月就好⋯⋯」
我都唔知可以講乜安慰佢:「唔好咁擔心啦,你俾佐心機溫書媽媽知既⋯⋯」
Fred(哭腔):「唔係架,我有俾心機溫書架⋯⋯但係上星期唔小心串錯佐個字,媽咪好嬲,之後話淨係俾一次機會我架咋,我唔可以再攞唔到一百分架⋯⋯好難啊⋯⋯都無可能既⋯⋯」

我都唔知可以點安慰佢,淨係可以拍下佢膊頭,之後佢就要搭校車走。

如果佢阿媽知道搞到個仔咁擔心,佢會唔會好肉赤?

到依家我都仲間唔中都會稔起Fred,唔知佢依家點呢 ⋯⋯

喺同一日,我見到做研究第一批小朋友(全部升佐小一)啲細佬妹,問佢哋:XXX(阿哥/家姐個名)點啊?我好掛住佢啊。
細佬一(K2):唔好!佢中文好唔好啊!
細佬二(K3):佢成日都要做功課,媽咪成日都鬧佢。
細妹一(K3):哥哥唔喺度啦,佢去佐第二間學校喎,唔知叫乜名,不過佢話係全世界最多功課既學校,你去嗰度就會見到佢架啦!
細妹二(K3):佢讀緊小學囉!我都就黎讀架啦!不過好多功課,仲多過我哋啊⋯
細妹三(K2):佢測驗無印仔唔開心。

啲細佬妹眼中既小學生活真係好得人驚。

其實,兩個半世紀(1762年),哲學家盧梭已經咁講:

喺你攞佐大自然份工之前,俾啲時間佢做嘢,唔好搞亂檔。 你堅信自己知道時間既價值,驚死會嘥晒啲時間。 你意識唔到用錯時間其實衰過乜嘢都唔做,仲分分鐘會教壞細路,搞到佢無品過啲乜都唔做嘅細路。 你驚見到佢一日到黑喺度hea。點啊! 開開心心真係無意義?跑跑跳跳咁過一日真係無意義? 佢成世人都唔會再忙。 (廣東話試譯)

Jean-Jacques Rousseau (1762) — Émile ou De l’éducation (Emile, or On Education)

即係幾千年前都已經有大人覺得小朋友唔應該浪費時間自由自在咁過日晨⋯⋯點解大人唔可以稔返自己細個最想係做乜嘢?

--

--

思然 oce

PhD | Research Psychologist | Psychometrician | Computer Science Teacher | IT Auditor/Consultant | ex-CISA/CISSP | Top Writer in Humor | Work in HK, UK, USA