（警告：
本文有大量日劇重啟人生（ブラッシュアップライフ ／Brush Up Life）劇透，我本來寫「放心，本文沒有劇透」，點知寫落發現唔劇透真係無辦法寫落去，所以，如果你未睇「重啟人生」又打算睇，唔好睇呢篇文住。
如果你本身唔打算／無興趣睇，等我趕下客先：
呢套劇係講個主角意外死佐，一係就投胎做動物，一係就重啟人生——即係重生由出世開始再過一次人生，同時帶住死之前既記憶，積多啲陰德等下次可以投胎做人……
呢個「parallel universe / alternative universe / 平行線」既設定越睇越精彩，舖得好好，好過發佐神經既奇異博士幾萬倍，同埋都有唔少位會令你稔好多嘢……
就算你對平行線無乜興趣，呢套劇都仲有另一樣好值得睇既：
如果你係八十後，又有少少鐘意睇日劇，你有好多位回憶位：主角既童年同我哋有好多重叠，例如佢哋會交換貼紙，影貼紙相，唱Ｋ，去吉之島，佢哋追既日劇（連）我都有睇過（我中學其實好少睇電視），播既J-POP，第七集播ZARD既負けないで嗰刻，配合埋個劇情，感觸到差啲喊。
好嘞，我好努力咁趕完客，如果咁都趕你唔走，以下開始正文。）
最近一口氣煲完日劇「重啟人生」，很感觸。
或者我都算係啱啱重啟人生——我稔我算開始緊我既三周目人生（第三刷自己既人生，我理解既呢套劇入面，佢哋用「周目」係日文打機術語，一周目就係第一次打個遊戲，二周目就係啲人打爆機之後重新再玩個遊戲，三周目就係打爆二周目又再重新玩，如此類推……）：
離開香港去佐英國，開始做自己童年夢想既職業——老師。
因為係重啟人生個故事入面，主角既童年時間其實改變唔算多，「過關任務」就係得幼稚園時要阻止老師同同學仔個老豆發展婚外情，同佢去到四周目開始發奮讀書外，所以其實去到入大學之前，其實改變都唔係真係話好多。主角既一周目係做公務員，二周目係做藥劑師，三周目係做電視編劇，四周目係做醫學院研究員，五周目係做機師。）
我既一周目就係讀計算機工程之後做迫科核數師／電腦資訊安全顧問。
二周目就係讀心理學之後讀研院做心理學研究主任。
三周目就係依家，做佐年半learning support assistant，開始讀PGDE (Postgraduate Diploma in Education and Leadership)，九月開始正式做中學既電腦老師。
話時話，我人生讀佐好多intensive course，包括三個月學好會計，一年讀晒心理學學士內容，依家為佐可以九月就開始正式教書，啱啱用一個半月讀佐PGDE一大部份既教學理論課程——之後主要係實習，寫教學反思同學科既理論。我有時都唔知自己做乜鬼攞苦嚟辛。
（當年PhD畢業我仲話唔會再讀大學因為唔想寫thesis，正一烏鴉口。）
主角每一次重啟人生，都會有得著同遺憾。佢去到四周目，主角為佐可以積多啲陰德，等佢可以投胎做人，決定要做醫學研究——佢覺得做醫學研究可以救好多人，一定可以積好多陰德。於是佢由小學開始發奮讀書，搞到同佢一二三周目既兩個死黨變成客客氣氣既普通朋友，睇到人好心酸，因為真係好現實——我每一次重啟人生，都會無可奈何咁同自己既死黨疏遠。當然，每一次重聚都會好珍惜，但係有時都好想可以同佢哋見多啲面。同埋，我稔我哋去到咁上下年紀，每個人都有啲「死黨」無緣無故咁疏遠佐，就算你努力咁希望可以同返「死黨」做朋友，但係最後都只可以做客客氣氣朋友……尤其我哋香港人，大家都經歷過友情既重大考驗。
主角去到四周目，同另一個朋友相認，原來佢已經過緊五周目。喺佢既一周目，佢同主角同嗰兩位死黨都係好朋友（即係個朋友圈本身有四個人），但係佢為佐要救另外兩個死黨，二周目就開始努力讀書做機師阻止空難，變成有三個周目得自己一個努力，仲俾兩個死黨加埋主角講做讀書好叻好勁不過太勁難以接近。
所以，當主角同佢啲死黨喺五周目成功咁做返好朋友嗰一幕，我真係喊佐出黎。我都好鐘意個結局佢哋四個一齊投胎做鴿子，呼應返投胎做人唔一定係最好既生命，真係一個既好既結局。
故事有趣既地方係喺主角做編劇時，佢用自己既故事寫佐個劇本「重啟人生」，點知俾其他人話個橋好但係重啟人生應該要做啲勁嘢好似拯救地球於是勁改佢個故事。最慘係心血未播出主角就意外死佐。
不過，如果我哋香港人可以重啟人生，我哋又有無辦法拯救香港呢？我真係稔佐好一段時間…………
同埋我同主角有幾個位好似，都係有個妹，要靠阿妹車出車入，阿妹結婚有細路，同最搞笑係，我有送過同一個按摩器俾阿爸做生日禮物，我見到個按摩器真係爆笑佐。
套劇有啲位其實重覆得有少少悶，不過我又明點解會有重覆。同時，矛盾既係，套劇成日都搞到我好緊張，因為成日形住主角會突然有意外死佐。
廣告：https://ko-fi.com/ceoce 大家如果可以，請支持一下。呢度（無論係Medium定嚟緊開始做既「無牌電腦老師」）收入真係太低……
