買鞋⋯⋯買鞋⋯⋯買鞋⋯⋯
睇呢個廣告嗰陣，我仲以為係宣傳手法，邊有人成日去買鞋。我嗰時應該係得五對鞋：拖鞋，波鞋，行山鞋，制服團體軍靴同步操隊皮鞋。完全稔唔到原因要多過五對鞋黎做乜。
到後來去見暑期工，以為著高踭鞋好啲formal啲，買咗對大約一千蚊既Clarks高踭鞋 。點解要咁豪？因為以前去法國交流，交流著既制服要高踭鞋，稔住著得嗰兩個星期，求其買對特價既無牌子高踭鞋就算，點知未去到飛機場已經抽筋，上機後雙腳水腫仲塞唔返隻腳入隻鞋度，對高踭鞋令我既法國之旅加添咗唔少痛苦既回憶，於是一返到香港即刻捐佐呢對著得幾次既高踭鞋俾救世軍。
經歷過呢次慘痛既教訓，我稔住買對名牌Rockport應該無死掛，反正之後返工可能都要著。明明試鞋時都OK既，但係到見工嗰日，由大學搭車去到北角，搭地鐵已經抽筋，之後，行緊去見工既公司途中，又抽筋，行都行唔到。好彩我不嬲都預多好多時間，咁啱喺mos burger隔離，於是入去飲杯咖啡休息下再行。但係見完工之後，離開公司行無耐，又抽筋。
由於我下畫仲要去中環見另一份internship，猛抽筋都唔係辦法，死死地氣去附近既吉之島買鞋，而由於對腳腫咗，時間又趕急，無得慢慢格價，我唯有買對比我正常大半個碼既Clarks平底皮鞋，喺一個星期買兩對名牌鞋，簡直係創舉，兼超級肉赤。（好彩見得成下晝份工咋。）
所以，我討厭買鞋：我唔賭，但係買鞋就係焗賭大細：賭唔會買細咗又或者唔會買得太大。到底係我對腳成日變大縮細，定係啲鞋冷縮熱脹，總之我成日都買錯鞋。明明去舖頭試都覺得舒服好行，但係到真係新鞋落地，硬係有機會刮到流血，太緊/太鬆。新買既鞋其實係Schrödinger’s shoes：未出街真係著過既話，個state都係又啱著又唔啱著。
於是，我記錄低每一對啱著既鞋既資料，從而提高買鞋既勝算（真係當自己去賭）：
記錄咗幾次，發現啲US Men’s同US Women’s真係好亂，唔同牌子代表唔同尺寸。CM一定係最準，但係唔係對對鞋都有CM。其他尺寸個range可以爭幾遠（尤其係Camper，唔知佢哋點計個US Women’s出嚟），買大佐最多都係鬆啲，買細佐就無計。
但係，我咁樣做晒功課，都係會出事，試過買對Camper 40號雪靴，明明喺香港試係啱著，之後去大雪地方公幹，對雪靴緊到好辛苦。（定係對鞋冷縮佐？）又試過買對40.5既Nike，都係夾腳⋯⋯
因為著開對鞋就爛，又要去買鞋，忐忑不安中：買鞋⋯⋯買鞋⋯⋯買鞋⋯⋯而我只會係「心情唔好，買鞋」，又或者其實係「買鞋，心情唔好」。
