幼稚園研究:有少少搞笑,但多多辛酸⋯⋯

思然 oce
Jun 8, 2018
Photo by Kelly Sikkema on Unsplash

早幾日返幼稚園,即刻大病一場,不禁回想起做幼稚園研究既辛酸吏:

1)細菌病毒天堂

首先,幼稚園最恐怖既唔係多細路,而係多細菌。每逢轉季,小朋友就會輪流病。由於佢哋啲菌我哋平時少接觸,無乜抗體,所以,我同幫手既研究員好易中招,通常收data期間有一半時間都係病住咁收。

最嚴重一次,一個男仔個樣好辛苦,我踎低問佢有冇事,佢眼泛淚光咁望住我,氣若游絲咁講:「謝⋯老⋯師⋯我⋯」之後就嘔,嘔到我成腳同鞋都係。幼稚園政策,一嘔就要全班要緊急疏散去外面操場,咁我都中晒招,老師無謂留喺課室陪葬,於是我就叫佢帶晒成班出課室疏散,自己留佐喺課室陪個小朋友等校工姨姨嚟清理。之後嗰晚我發高燒,病佐成個禮拜。

如果唔係成日要接觸小朋友,可能唔明白小朋友既菌有既恐怖,以為我身子弱。但係,細佬哥病菌既惡毒程度其實連醫生都驚。當年病到七彩,返大學睇校醫,個醫生一見到我,大驚:「你!你係咪喺幼稚園做嘢嗰個!?」我點頭(已經講不出聲),佢秒速戴上口罩。我睇佢咁多次,從來無見過佢戴口罩,梗係之前見完佢傳染埋俾佢。

2)蚊樂園

除佐細菌病毒,幼稚園仲有好多蚊:唔知係唔係因為小朋友好惹蚊,定係幼稚園啲膠花盆底有積水。但係,唔好似為小朋友惹蚊大人就無事,我同另外兩位惹蚊既研究員成日都俾蚊咬。

而乜嘢蚊怕貼、蚊怕水、蚊怕帶、超聲波驅蚊機等,通通都係無用既。好多小朋友都雙管甚至三管齊下,成個班房都係蚊怕貼水帶味,聞到我都頭暈暈,結果我哋同小朋友都仲係會俾蚊咬。

幼稚園好似有搵過滅蚊公司嚟處理,但係有效期好似連一星期都無。

3)天氣的錯

依家啲小朋友真係繁忙兒童,幼稚園無乜自由時間,而我既研究其中一部份要睇佢哋點樣玩,所以,我每日得十幾分鐘有嘢睇。(係,小朋友喺幼稚園得幾分鐘可以free play,仲成日都係玩埋啲「教具」 — 數積木粒粒之類。)

由於每個小朋友都要觀察一定既時間同日數,所以本身已經好趕。如果打風落雨搞到無得返學,咁就唔止唔返學嗰日無得觀察,老師第二日仲因為要追進度,啲小朋友差唔多無得玩,我就無得觀察。

而且,有時唔一定要停課,只要行雷或者大雨,就會有小朋友喺度自言自語:「唔駛驚驚架」,「阿媽會唔會唔記得帶遮」⋯⋯又有幾個嚇到喊,咁又觀察唔到佢哋。所以嗰排我一見到李氏力場,我就話佢廢 — 唔係因為無得放假,而係因為力場無能力令小朋友要返學。

我甚至試過有晚不停發惡夢,掛佐起碼兩次三號風球,一次六號風球(我仲諗:「吓!乜有六號風球架咩?」之後嚇醒佐)同一次八號風球……所以,我嗰時成日稔,如果因為唔夠data畢唔到業,一定係天氣的錯。

我知,「天氣的錯」歌詞其實得幾句天氣的錯,而且根本就唔係講緊「天氣的錯」。但係讀過研究院既人,就會明白個「你」字可以代入論文或者數據分析結果(甚至係你跟緊既老細 :P)正所謂「我同我篇論文拍拖,關係複雜」。

4)時間限制

大部份研究都可以今日唔得,約下個月甚至下年都得。但係K1小朋友,半個月既表現已經可以好唔同,所以每兩個星期要最少觀察佢哋一次。一出水痘,或者家長請大假去旅行,唔返個幾兩個禮拜,我就無得補返啲觀察,咁就無佐一個小朋友既數據。

更大鑊既係,因為我追蹤小朋友三年,要趕喺佢哋畢業前收晒啲data,佢哋停課一日我已經會好煩,停多幾日我真係業都唔知畢唔畢到。所以,去到收data最後一年,我發得最多既惡夢除佐「紅雨」同「打風」,仲發過超級恐佈既惡夢:爆發「手足口病」、「禽流感」等,全校停校至放完暑假。

5)體力透支

觀察小朋友玩既時候,大部份時間都要彎腰、踎低或者跪低,有啲觀察緊既小朋友俾其他小朋友阻住,仲要彎腰同時側身先勉強見到個小朋友做乜,同埋佢哋會行嚟行去,我哋就要以「彎腰踎低跪低」既姿態移動,同時又要避開其他小朋友 — 香港寸金尺土,幼稚園課室其實好細,所以周圍都有障礙物。移動既同時,我哋仲要做記錄,寫低小朋友做緊乜講佐乜嘢。

同時,我哋除佐會受病菌攻擊外,仲要小心小朋友突襲:除佐成日俾佢哋踩同撞之外,我試過俾一個玩到癲佐既小男孩連環拳擊,有個同事俾一個小女孩亂拋玩具鑊擊中前額,起佐個瘤。所以,我哋除佐要集中精神觀察一個小朋友之外,同時要眼觀六路耳聽八方。

到小朋友大啲,仲要同埋佢哋做task,成日要chok聲講嘢,於是連把聲都用盡。於是,收完一日data,體力腦力精神聲帶嚴重透支,返到屋企仲要整理返啲記錄同數據,係完全無能力做其他嘢同講嘢。

所以,雖然我寫埋寫埋,寫佐好多篇「有少少搞笑」既幼稚園觀察記錄,但係大家千祈唔好以為觀察既時候都係咁愉快,啲記錄好多都係踎住寫,第三年仲搞到要做物理治療,真係全部都有血有汗架。

不過,我無後悔過揀佐呢個研究題目,點解?唔⋯⋯或者,愛情真係盲目既。

--

--

思然 oce

PhD | Research Psychologist | Psychometrician | Computer Science Teacher | IT Auditor/Consultant | ex-CISA/CISSP | Top Writer in Humor | Work in HK, UK, USA