常言道：萬事開頭難。
不過，如果講寫文，開頭一啲都唔難，埋尾先真係難。我依家有162篇Drafts未埋尾。就連呢篇「寫文容易執文難」，其實９個月前已經開始寫。差唔多時間都開佐一篇叫「佛系medium寫文法」，又係爛尾。
呢篇文本來應該唔會出現係世上，不過 IF 提起「一係太硬頸，寫啲自己鍾意但讀者唔太有興趣嘅嘢」，我就覆佢我淨係寫自己啲無聊稔法或者低能嘢自娛，依家有百幾篇draft，而且仲有篇draft係講有百幾篇draft既窘境…
講下講下，我就應承話快少少執起呢篇文，亦做就佐呢篇文既面世。
唔知大家寫作過程係點。我起初其實係想寫從有特殊學習需要學童角度寫的小故事。不過呢啲小故事要好認真寫，同埋要做資料搜隻，所以好花時間，結果只係寫完幾篇。Draft入面都仲有十幾篇，不過應該短期都比較難埋尾。
不過本身一向鐘意寫文，寫返起舖癮，於是就繼續寫啲唔需要咁認真既嘢，變成主要係忽然稔起啲無聊嘢，又或者見到啲奇怪嘢，又或者記返起啲搞笑嘢，又或者睇緊其它文勾起回憶，就會用手機打幾句做記錄或者自娛。因為我一日搭兩個鐘車返工，所以好多時都係搭車時打文，亦因為咁我頗多文都係啲車廂觀察——其實明明係寫緊文，不過車廂入面發生佐事，咁就順便記錄埋。
至於一篇開佐頭既文會唔會完成，我就好佛系既——搭車又或者等人自己一個人排隊買飯時都會用手機密密打（搞到成日搭車搭過龍），好少會喺屋企坐定定用notebook寫文，除佐最後要加返幅圖同執吓錯別字。
結果，啲文寫得完就寫，寫唔完就算。部份文有時間性，過一輪見返，都已經outdate，於是delete draft算數。
另外，如果一篇文寫寫下覺得稔唔到點寫，又或覺得悶，我就唔會寫落去。同埋好多時未寫完一篇文，又有另一篇文想寫，於是又New story，「坐這山，望那山，」文就開佐一堆，寫完既就好少（呢個情況同樣發生喺我工作上要寫既文獻上，我有好多draft……）。所以，每次完成一篇文，可以按publish已經好滿足。
成個寫文過程，同揀寫乜嘢，我都只係寫自己想講自己想寫自己覺得有趣既嘢。好少估讀者想睇乜，因為根本估唔到，好多文我都以為無乜人會睇，有人睇就係bonus。
雖然寫既過程無稔過讀者鐘意睇乜，但係有人睇，有人拍手，都會好開心。我稔呢個都係點解我寫佐成年都仲繼續寫（咁都有少少Operent conditioning既）。多謝大家😊
最多View同Read既誤入Big4系列，不過大部份都係google入黎睇……所以like數其實唔多。
