網上流傳一個完美主義阿媽：
特意不給擦膠予兒子，以訓練他一落筆就要答案正確，不希望他寫錯一粒字。
呢個阿媽真係傻的媽，如果無擦膠就可以訓練到唔寫錯字，咁喺發明擦膠塗改液之類既嘢之前，啲人就唔會寫錯字，咁又點會出現擦膠塗改液？擦膠既存在，就係話俾你聽，擦膠唔係令錯字出現既必要條件。當然，我唔排除有擦膠可能會令人寫多佐錯字既⋯⋯
不過，傻的媽，你自己打字係咪唔會用backspace先？
我細個好俾心機寫字，但係就係處理唔到啲格仔既空間，啲多筆劃既字我硬係寫完上面嗰舊就無位寫下面，所以成日都要擦擦擦，紙都擦爛埋，好辛苦。再加上我啲小手肌麻麻，寫字寫一陣就無力，所以啲功課貼滿膠紙同埋寫滿好肉酸既字。
到依家，有時喺幼稚園見到啲認真寫字既小朋友，俾老師擦佐啲字既慘慘豬樣，我都有少少想喊 — 明明好俾心機，好想寫得靚啲，仲見到隔離位書法比賽冠軍同學啲字好整齊，寫得仲好快，唔知幾羨慕，自己寫唔到已經有少少唔開心，你仲要擦我啲字⋯⋯
有時稔，如果初小時唔係因為咁介意啲字醜，寫多啲日記同故仔，依家可以睇返就好。
小學一年班，先生（即係老師，我細個嗰時係叫先生既）送佐本唐老鴨單行簿俾我，本來稔住返屋企用黎寫故仔。但係返到屋企，拎佐本單行簿出黎，打開第一頁，心稔：「好白好滑啊啲紙！」
當年啲功課簿既紙都係黃黃哋既，喺屋企就係用阿爸公司啲廢紙嚟做草稿紙，見到本白雪雪滑捋捋既筆記簿，明明唔係特別鐘意唐老鴨，但係稔起自己手勁核突既字，竟然都係落唔到筆。
於是我就將本筆記簿珍而重之咁收埋佐係櫃桶㡳，之後，我間唔中都會收到唔同既筆記簿（學校真係好鐘意送筆記簿俾小朋友），有兩本仲要係硬皮有鎖既日記簿，我嗰時都有衝動想寫日記，但係最後都係接受唔到自己手字，繼續收埋，稔住等自己啲字靚啲先用。
結果，幾年前執屋，先開心大發現，見到成叠無用過既筆記簿，放佐咁耐，唔再白雪雪滑捋捋，好嘥。更可惜係，嗰時想寫嗰個故仔係乜？嗰時既日記又會寫佐乜嘢呢？
無人想做錯嘢，小朋友都係。但除非你成世人乜都無做過，如果唔係無可能無做錯過嘢。（不過乜都無做過算唔算做錯嘢呢？）即係老海鮮守則：多做多錯，少做少錯，唔做唔錯。
好多人都試過因為唔想犯錯所以無做一啲想做既嘢，小至唔想劃花本簿，大至示愛求婚轉工等。但係，唔衰過又點學到嘢？
