新聞：七歳男仔喺學校偷食物等佢返佐屋企有嘢食。你以為係Les Misérables？
唔係，其實係英國。
無錯，英國經濟其實真係唔係好掂。好似我咁，都叫做喺學校有份正職都唔夠交租同水電煤同稅：係，因為屋主自殺，我真係有稔過搬，加上成日要幫手搞啲法律手續——屋主啲遺產問題，個律師仲要勁不負責任，另文再講——所以我越黎越想搬，但係要搵返單向一小時交通距離既租盤既話真係起碼要俾多二百鎊，而且仲要細過我依家間房好多，所以為佐可以慳錢都係唔搬住。
我學校本身有超過一半學生都係有free school meal資格，即係家庭收入真係好低。好多學生晚餐都係食唔飽。仲有一大堆係屋企無人理但係又無free school meal，成日都有學生頭一兩堂話好肚餓因為屋企無早餐食。
因為咁，我學校最近既德政係開放breakfast club俾所有學生。breakfast club之前係要申請既，因為除佐有早餐食，本身主要係俾啲有特殊學習需要既學生問功課啊，一齊玩啲簡單遊戲訓練社交。所以通常得特殊學習需要學生同free school meal學生申請。
學生本身係八點二十三分打鐘既（唔好問我點解咁零丁係二十三分，我都唔知點解，可能係想二十五分所有人去到晒早會地點／課室掛），依家學生只要八點前去到飯堂都可以食免費早餐，有麥皮，多士，牛油，果醬，MARMITE（呢個主要係老師食既，英國特色食品，好咸但好有益，個樣好似朱古力醬，我見過有學生中伏以為係Nutella ，而個樣真係有少少似），仲有牛奶粟米片啊朱古力可可脆米等等，都算幾豐富。有啲特別日子仲會有牛角包同朱古力酥——但係因為貴，所以好少會有。
好多學生為佐有早餐食，就算呢排咁凍，佢哋都會七點半返到學校。前幾日落大雪，啲交通好亂，好多學生都去唔到breakfast club，而咁啱嗰日係有牛角包同朱古力酥。
負責breakfast club既同事知道有幾個學生屋企問題，無早餐食真係會好肚餓，所以特登包起一堆牛角包同朱古力酥俾佢哋小息食。
我咁啱同其中一個Ａ仔一起，我個同事阿悅遞佐一隻紙碟，上面有一個牛角包同朱古力酥，話：「你係咪無食早餐啊？俾你食架。」
Ａ仔見到嗰兩個包開心到笑出聲，即刻攞佐隻碟。我見到佢咁開心，我都好開心。
