畫畫堂教畫八爪魚，男仔跟住老師畫咗好大隻嘅八爪魚喺畫紙正中間，之後自己再加咗一條魚仔同一啲波浪。佢好俾心機咁幫條魚仔油咗紅黃藍間條。佢睇住條魚，好滿意咁笑。
跟住佢就喺條魚上面用力咁油咗一層灰色，跟著又油咗一層啡色，跟住又油咗一層綠色……顏色越嚟越厚。
隔離住個女仔皺眉：「你唔好咁玩啦……好核突啊！」
男仔唔理繼續油，油咗超過十層。
然後，他雙眼發光同我講：「謝老師，我條魚係咪好靚呢！」
（其實佢已經油到根本睇唔到條魚，淨係見到一大撻顏色。）
我：「好俾心機喎，不如油下隻八爪魚啦！」
男仔：「我要油好條魚先！好勁啊我條魚！」
然後男仔繼續自我陶醉咁油顏色。
女仔：「唉……我無眼睇啦！」
到老師催交畫嗰時，個男仔先摛摛青咁油隻八爪魚。佢排隊交畫，猛咁同其他老師同同學講「我條魚好靚啊！」
見到佢咁興奮咁開心，我就稔，其實我哋都有啲其他人唔欣賞唔明白既興趣或者夢想，而現實就係嗰隻八爪魚。我哋細個嗰時可以乜都唔埋去畫條魚仔，點解大個咗就要為咗要畫好隻八爪魚而迫住唔理甚至忘記條魚仔呢？
第一次試吓成篇用廣東話，硬係怪怪哋咁⋯⋯
書面語版：
