今天，去老師其中一位學生的會所學小提琴，在更亭跟看更說：「我去會所學琴架。」
看更打開門，然後和對講機說：「有位音樂老師上黎教琴啊！」
我想：「我明明話去學琴……」
對講機說：「點樣架？」
看更：「係女搣時(miss)嚟架！」
我又想：「有男miss的嗎？」
似乎大部份人都覺得大人唔會學樂器。學佐小提琴四個幾月，每次遇到識既人，見到我拎著小提琴盒，都以為我去教琴或者夾樂團。聽到我係去學琴，而且仲要係重頭學起，都一臉難以置信。
點解大人學樂器係一件咁不可思議既事呢？我有同事去學插花，學書法，學畫畫，學潛水等等，無人會覺得奇怪。唯獨係學樂器，大家聽到都覺得難以置信。開頭我有稔過係咪我個樣唔似會學樂器，但如果係樣既問題，又無理由會以為我可以教琴，所以應該都係「大人學樂器」問題……
無可否認，大人學樂器，尤其係小提琴，要變成專業係幾乎無可能。但係香港又有幾多個小朋友係因為想成為音樂家去學樂器先？明明學樂器可以係一個興趣，但係香港既環境，令興趣變成求學工具，令大家都覺得學樂器只係為佐一紙證書。教琴既朋友話好多家長只係想小朋友學好考級既歌，小朋友自己鐘意既歌其實無時間練，好多小朋友CHUR到八級，淨係識彈考試歌，又有好多小朋友一考完八級就無再學同練琴。
身為大人，進展比起網上那些幾個月就能表演的天才小孩緩慢得多，但現在也算可以拉自己喜愛的歌，當然音準音色還有排執。打個比喻，就好像能唱張敬軒的歌，雖然有點走音，聲音單調，感情亦不足，但自己能唱出一兩句其實已經很高興了。而且，學小提琴令我更懂得欣賞小提琴演奏，以前去聽演奏，只知道很好聽那樂曲好像很難演奏家好厲害，學了小提琴才知道那個「好厲害」是有多厲害……
雖然很享受學小提琴，但練習總是有令人煩惱的地方：現在最難的是那隻可惡的手指尾，完全不受控制……每天也會花時間練音階去訓練他，但他的進展極其緩慢——只好把他當成平時做研究遇到的有特殊學習需要小孩吧，進步是急不來的，而且付出與收入也不成正比。不過，只要俾心機，總會有進步的！
加油啊手指尾……
