我舊年一入職，我老細就叫我跟一個中二EAL學生。EAL即係English as an Additional Language，英語作為附加語言。EAL學生即係佢哋既母語唔係英文。以前係叫ESL, English as a Second Language，好似話因為對好多EAL學生英文分分鐘連佢哋既第二語言都唔係，佢哋可能係阿爸講法文阿媽講西班牙文，所以英國學校唔會再用ESL呢個term。
我呢個EAL學生成日上堂四周走，大叫，猛要先生應佢，為佐搶老師既注意力，佢會不停咁叫「sir sir sir」，搞到完全上唔到堂。
佢話自己最鐘意呢個數學老師萬Sir（化名），因為萬Sir支持曼聯，同無罰過佢留堂。（其實萬Sir有罰過佢留堂，只係佢唔記得。）
我用佐好多方法幫佢，經過半年，佢叫做可以坐定定少佐好多大叫同跟都指示做嘢。不過，我懷疑佢個問題唔止係英文，而佢應該仲有智力發展遲緩，或者佢數學障礙。
踏入中三，一開始佢個人定佐好多，因為我唔駛再用太多心機去幫佢集中精神，叫做開始有時間教下佢計數，佢數學測驗成績由零分去到三分去到五分，而最近一次竟然有九分（五十分滿分）。九分唔多，但係如果佢可以咁讀落去，會考可能都會攞到一兩分，以佢既能力，已經算唔錯。
見到佢有少少進展，我好有成功感。不過，最令我最有成功感既其實係當佢發現自己計到條數，計得啱，佢個真心滿足開心既樣。我今年仲每星期有一日同佢一對一補課。敝校有一科叫「獨立溫習（independent study）」，唔係俾啲學生獨立溫習，而係教啲學生點樣可以獨立溫習，所以啲堂係教佢哋溫書既方法，記憶既方法，例如用mindmap／flash card／brain dump之類。
但係我呢個仔係金魚記憶，基本上叫佢brain dump，佢個腦根本就無乜嘢可以dump。所以我已經半放棄佐跟個課程，而係變佐幫佢補數。
當然，如果個課程我覺得幫到佢，我都會試下教，就好似mindmap。我用佢自己做中心，寫晒我知到有關佢既嘢，例如佢係男仔，年級，住邊，一邊講一邊寫……
我：「咁你最鐘意科目係乜？」
仔：「無喎，無嘢鐘意」
我：「咁足球呢？」
仔：「係喎，我鐘意ＰＥ」（我寫低ＰＥ）
我：「咁我知你最鐘意既球隊係曼聯……」
仔：「係，我最憎紐卡素同利物浦。」
我：「咁你最鐘意既老師就係萬Sir。」
仔（刪去萬Sir）：「唔係，Miss，你係我最鍾意嘅老師。」（No Miss, you are my favorite teacher.）
佢以前上堂會同我講「我唔鐘意ＹＹＹ老師，我鐘意萬Sir點解佢依家唔教我（I don’t like Miss YYY， I like Mr XXX why he is not teaching me now）」。我會叫佢唔好咁講，因為咁無禮貌，要尊敬老師。佢之後每次想講I don’t like Miss YYY，都會話：「我尊敬ＹＹＹ老師，但係萬Sir係最好既，佢從來都無罰過我留堂！（I respect Miss YYY, but Mr XXX is the best. He never gives me detention ）」
有次，我用手勢叫佢細聲啲，佢加多句同我講：「我講真架！同埋Miss（Miss係指我，佢叫我做Miss），你喺我第一位最好。（I am telling the truth, And Miss, you are my first best）」
我嗰時仲以為佢只係隨口講。
佢呢排開始有少少踏入青少年期既反叛，成日都要挑戰老師既忍耐力底線。因為我既工作係要令佢可以專心學習同老師可以順利教書，所以佢挑戰老師底線亦都即係挑戰我既底線。
而我最唔鐘意佢試都唔試就話「唔識」。佢每次唔做嘢淨係話唔識我就好想發火。所以，我決定寫呢篇，記低佢對我好既時候喺點，等佢激到我嘔血既我可以睇下冷靜下。
