香港我嗰代既人（即係八十後），大部份都有英文名，我都唔知道點解大家都會有英文名。去到九十後，仲有好多係直程身份証上面既英文名有埋個英文名，甚至有啲人英文名喺得英文名，無中文拼音。
我記得小學嗰時，阿媽幫我九唔搭八求其咁改佐個英文名——唔知係Ivy定Ida之類，我嗰時問佢做乜改呢個名，佢話三個字唔驚串錯。不過，小學應該淨係英文堂會叫你個英文名，次數少到我連自己當年個名都唔記得。
升中學，因為我哋係英文中學，老師要求所有同學一個星期內要喺坐位表度寫埋自己個英文名，如果無既話，他就會隨便幫我哋改名。好多同學本身都有英文名，我當時就求其幫自己重新改過一個英文名，唔記得點解會揀嗰個名嘞。其他無英文名既同學就搵啲球星名星做自己個名，例如Owen，除佐有個男同學去到星期五放學都話稔唔到叫乜英文名好，於是老師說：「咁你就叫Tom啦。」當時佢仲一面無所謂話：「是但啦。」
後來佢覺得叫Tom唔好，於是幫自己改佐另一個英文名，但係我哋一直無理過佢個新名，淨係叫佢做Tom。（話說佢前女友係我同事，有日佢同我講：「咦我男朋友ＸＸＸ喺你中學同學喎，佢話同你好熟架。」我話我中學無同學叫ＸＸＸ，後來Tom直接搵我，叫我唔好爆佢叫個Tom既黑歷史俾佢女朋友聽。）
咁我依家個英文名係中四先幫自己改既，跟佐我都二十幾年，點知去到外國，我係反而用唔到自己個英文名，因為呢度所有嘢都要對到護照上面個名，就連返工既職員証都係。
大部份香港人個名都有三個字，姓一個字，名兩個字。
英國（同美國）成日都會將個名既第一個字做First Name，第二個字就做Middle Initial。有啲系統會直程淨係記得你第二個字既第一個英文字母就算。我喺美國就試過有人打黎話「May I speak to … er… Many Taxi?」，我開頭仲以為嗰個人係想call taxi打錯。
係，我個名第一個字係Man… 第二個字開頭係Y。
而我係姓謝—Tse，我自己都唔知英文應該點讀。
第一個字係Man其實都好搞笑，我收過電話單上面寫住：Hey Man! 我本來仲以為個電話單做乜咁奇怪。後來我先發現我登入啲系統全部都係Hello Man, Good morning Man咁……老實講，如果喺街有人叫Man，我應該唔會識得應。
香港人又好興將兄弟姐妹既名其中一個字改做一樣，而我阿妹個名第一個字都係Man。阿妹好早就去佐英國讀書，而我又去過紐約做嘢，於是間唔中都會有啲寄俾Man Tse 既信去我哋香港地址，我哋以前係靠邊個國家寄黎分係寄俾邊個既。
但係我依家都黎埋英國，仲暫住喺佢度，咁點算好呢？
既然我哋個名分唔到，咁唯有靠個title黎分啦。於是我登記所有嘢都迫住用Dr，呢個應該博士個title最實際既用途嘞。
