人生第一次坐Herman Miller 櫈已經係二十年既事，當時係喺投資銀行做實習生，第一日返工，坐低喺位，嗰個前所未有既舒適感好震撼。（其實我稔面試嗰時已經坐過Aeron，但係面試時太緊張，乜櫈你都唔會覺得舒服。）心稔，呢張係乜嘢櫈呢，個樣咁怪，但係又咁舒服。
同同事熟佐之後，有一日傾傾下計，無意中我提起張櫈，同事話：「你真係識貨，呢張櫈好嘢嚟架，你有興趣可以喺公司內聯網買，有折。因為係外國貨，出面買唔到架。」（當年香港可能未有門巿買Herman Miller？）
我話：「咁誇張，幾多錢啊？」
同事：「唔記得，一齊去睇下先。」
於是同事㩒入內聯網搵櫈，我見到個價錢，仲以為自己睇錯佐。我記得係五位數字，而當年我屋企最貴既櫈都係幾百蚊架咋。
我：「乜咁貴㗎！？」
同事：「我都唔記得咁貴，我記得我有想過買但係最後都無買，横掂日日喺公司都有得坐又無乜幾可喺屋企。」
後來出黎做嘢，因為返迫科，成日都ＯＴ無乜幾可喺屋企所以就無特別理張櫈。而當時公司都係啲普通電腦櫈，所以，投行係勁過四大既，你睇佢哋用乜櫈就知。我應該係忘記佐有Herman Miller Aeron呢張靚櫈。另外，後生仔無咁易腰酸背痛，所以當時對櫈無乜要求，求其有得坐就可以。
直到我去紐約既總公司，竟然重遇Aeron櫈！同埋因為成日都係做投行既客，所以又成日有得坐Aeron櫈。不過因為喺紐約只係住年半，所以喺宜家求其買張櫈就算數。
返香港讀研院，真係一日坐到黑，加上開始年紀大，對櫈想無要求都唔得。但係讀研院人工唔高（但係都高過依家你話大唔大鑊）。於是四圍睇電腦櫈，格佐好耐價同試過好耐，最後係實惠買佐一張DuoBack Split Seat，都成二千成蚊，因為個樣好似兩塊肺，所以我叫佢做肺櫈。
人就話怕改壞名，原來櫈都係，開頭其實都幾好坐，唔知係咪我叫佢肺櫈，佢兩年後面舊膠就斷佐，名副其實既廢櫈。（又或者係我太肥？）
喺我又要搵櫈既時候，咁啱我有個親戚唔要一張Okamura Contessa II seconda，因為佢話坐佐好多年，兩邊個arm rest調高低又有啲問題，所以佢稔住買張Herman Miller Aeron，咁我就好唔客氣咁接收佐。呢張櫈其實都好好坐，我開頭仲稔，佢好似好過Herman Miller Aeron，有埋頭枕。不過坐落，其實個頭枕根本無用。
呢張櫈都應該接近一萬，不過真係一分錢一分貨，到我離開香港既時候，佢都仲係一啲新問題都無，我屋企人仲坐緊。櫈，真係貴買便坐。
嚟佐英國，因為開頭唔係成日要坐，人工又係前所未有咁低，所以就求其坐屋主提供既一張好舊既電腦櫈，因為太舊，已經無乜承托力，稔住坐住先，但有時間去宜室買張好少少既櫈。
到暑期後，英國戶口叫做有筆多餘錢，稔住去買櫈時，屋主就過生，結果，因為唔知駛唔駛搬，無理由又買張櫈架。屋主細佬雖然話應該唔會要我哋搬，但手續搞好之後都會加租，我又唔知佢會加幾多，所以稔住睇定啲先。
啲遺產繼承手續本來話舊年聖誔搞到復活節到依家暑期都仲未有消息，而感覺屋主細佬都應該唔會話打好多租因為其實好似我咁好既租客都唔係咁易搵（:P），最緊要係我依家讀PGDE，真係一日坐到黑上堂同睇文做功課，成日都腰痛，所以決定都係要買張好櫈。
上網睇勁多推介，最後發現比較好既都要四百鎊左右，仲要唔係咁耐用。同時，英國好興refurbished公司傢俬再賣，我見到五百幾鎊有時都搵到refurbished 既Herman Miller Aeron，而Herman Miller…
