之前研究小朋友社交發展，會問小朋友最鐘意同邊三個同學仔玩。方法係放晒同班同學既相喺枱面，問佢哋講最鐘意同邊個玩，之後就問如佢嗰個小朋友無返學，咁佢最鐘意同邊個玩，然後再問多一次。佢哋有時答得好有趣：
我：「你最鐘意同班入面邊個同學仔玩啊？」
小朋友：「我最鐘意同你玩！」
小朋友答佐一個名之後，我問：「咁如果佢無返學，你會同邊個玩啊？」
小朋友：「吓！佢做乜唔返學啊？唔可以唔返學架喎！咁唔啱架喎！」
小朋友答佐一個名之後，我問：「咁如果佢無返學，你會同邊個玩啊？」
小朋友：「我琴日都無返學喎！一齊係屋企玩啦！」（琴日黑雨停課）
小朋友答佐一個名之後，我問：「咁如果佢無返學，你會同邊個玩啊？」
小朋友：「唔會㗎喎！我同佢日日都有返學㗎，無試過唔返學，我－肯－定！」（斬釘截鐵）
小朋友答佐兩個名之後，我再問：「咁如果佢哋兩個都無返學，你會同邊個玩啊？」
小朋友：「咁咪同我自己囉…如果我無返學呢，咁小朋友都好掛住我……」
有個小女孩好鐘意同班的小男孩「陳小明」。問佢最鐘意同邊個玩，小女孩即刻答：「陳小明」。
做完個Task之後，小女孩問：「咦，你係咪問佐陳小明最鐘意邊個啊？」
我：「我係問佢最鐘意同邊個玩，唔係最鐘意邊個喎⋯」
小女孩：「一樣既啫。你話俾我聽啦。」
我：「唔得，秘密嚟㗎喎。」
小女孩：「你細細聲講俾我聽啦。」
玩住之後，叫小女孩㨂禮物。
小女孩一手拿走陳小明張相：我要攬住呢幅畫！我想帶返屋企！我好鐘意佢！
（搞佐好耐先攞得返張相）
「你鐘意同邊個玩」遊戲第一部份係俾同班同學相小朋友睇，問小朋友鐘唔鐘意同佢玩，第二部份小朋友最最最鐘意同邊三個小朋友玩。
第一部份
小男孩見到XXX張相，興奮：「鐘意！！我同XXX同YYY係兄弟黎架！我哋日日放學都一齊玩架！」（平時觀察佢哋三個真係成日一齊玩。）
之後見到YYY張相，再興奮：「梗係鐘意！我頭先咪話同佢同XXX係兄弟囉！」
第二部份
跟住問佢最鐘意同邊三個人玩，全部都係女仔。
我帶佢返課室時，忍唔住問：「你又話同XXX同YYY係兄弟，點解你唔係最鐘意同佢哋玩既？」
小男孩：「咁最鐘意梗係揀女仔啦！」
