家長幫小朋友改奇怪名，都算係全球化現象，美國英國都有報導過。香港情況其實都唔好得好多，最近做幼稚園頒奬禮既司儀，發現小朋友啲名真係越嚟越怪，越嚟越長，越嚟越難讀⋯⋯家長既創作力量同幻想，真係嚇佐我好多跳。
以下例子全部我都絞盡腦汁稔個一樣情況既例子出嚟（所以呢篇寫佐好耐），非真名，字同音都完全唔一樣。所以，「如有雷同，實屬巧合」 — 如果 貴子女／你識有小朋友真係叫呢個名，我真係恭喜佢，但我真係唔係講緊佢。
1）姓名共有四個字
自古以來，姓名共有四個字通常都係兩種情況：複姓（如令狐／歐陽），又或者結佐婚加埋老公個姓（如林鄭）。
但係呢幾年多佐幼稚園小朋友個名係四個字。我第一次見到有個小女孩叫林王小芳，我心稔，咁快結佐婚？乜依家仲有指腹為婚？後來同老師傾開，先知原來小女孩媽媽姓林，爸爸姓王，然後小女孩個細佬係叫王林小強。
我以為係個別例子，但係今年我又見到幾個小朋友跟晒阿爸同阿媽姓。
二十年後，會唔會有小朋友叫做陳司馬張司徒小明呢？
另外，我見到有個名係「陳日月星」。我問老師係咪打錯，其實係「陳明星」，老師：「佢真係係叫陳日月星架，阿爸話相士話佢個名要四個字先得。」其實四個字已經有啲怪，你仲慌死唔夠怪，改埋個名做日月星，去到小學實俾同學笑。
2）英文名／明星名
比較「常見」係英文名直寫中文，例如：李安立道（即係姓李，名安立道，呢個仲中埋四個字既名⋯⋯）、朱利亞（即係姓朱，名利亞）、羅拔斯、夏樂刻等，真係好怪。
但係更怪係明星名，唔係劉德華啊郭富城嗰類香港明星名喎，呢類反而少見（同埋都唔算怪，黎明、張達明、李彩華等都撞名啦）。依家興外國明星名：即係尚翴勞（Jean Reno 仲要搭個難字），畢彼特（Brad Pitt），布頓添（Burton Tim = Tim Burton）咁。
3）勁難讀／唔順口
有啲小朋友個名好難讀，要好小心先讀得啱，好似：黃汪旺、李利力，幾個連埋一齊 — 「獲頒勤到奬既小朋友包括洋揚郁、黃旺汪、何治晶、李利力⋯」，真係仲難過繞口令「一蚊一斤雞」⋯⋯
4）用古字／異體字／少讀既音／引經據典
用古字／異體字方面，倉頡無既字已經小兒科，有小朋友個名兩個字喺中華新字典都搵唔到，完全唔知點讀，例子舉唔到，因為我唔識其他類似既字。
有時就係有啲字有超過一個音，家長揀個少讀既音，例如小朋友叫係「好樂」，要讀「耗愕」。
