《Tabby McTat》好多外國小朋友都有睇過，因為作者Julia Donaldson 同 Axel Scheffler寫佐本街知巷聞既《The Gruffalo》。《The Gruffalo》其實係中國成語故事狐假虎威，不過狐狸變佐老鼠仔，老虎變佐怪獸Gruffalo，抄襲味濃，而我又搵唔到作者講過自己係參考狐假虎威故事改篇，所以唔太鐘意《The Gruffalo》。
但係Julia Donaldson 同 Axel Scheffler有好多其他兒童故事其實OK既，所以我都睇佐唔少。朋友知我有睇開兒童故事，所以佢多佐張《Tabby McTat》飛就問我睇唔睇。如果淨係睇音樂劇，其實無乜興趣，但係一來有興趣睇下幼兒睇音樂劇既反應，二來想知一場目標觀眾係幼兒既音樂劇會點排，三來Tabby McTat個故事簡單過The Gruffalo，本書五分鐘睇完，但係場musical有成個鐘，好想知佢點可以拖成個鐘，於是，今日就同朋友同一班小朋友一齊去演藝睇《Tabby McTat》。
以下有劇透，雖然我估呢度無人會搵呢本書黎睇：
主角貓咪Tabby McTat唱歌好勁好大聲，同街頭藝人Fred一齊表演搵食。有日，Tabby走佐去識女仔，而Fred就俾賊仔搶錢。Fred追賊跌親，入佐醫院。Tabby溝完女，返去主人嗰場，搵極都搵唔返Fred，於是就同貓女搵佐另一頭好住家，組織幸福小家庭。
Fred出佐院，但係表演開個地頭俾啲大媽霸佐黎跳大媽舞，唔係，係俾一隊band霸佐，又搵唔返Tabby McTat，唯有去第二度表演。
Tabby McTat同貓女生佐三隻貓仔，其中有隻叫Samuel Sprat，個樣同歌聲都好似Tabby McTat。另外兩隻仔，仔大仔世界，去佐另外兩家人度住，Samuel Sprat因為太大聲，無人要。貓女同Tabby老佐，貓女話想去唔同國家四圍玩，但係Tabby McTat就掛住Fred，決定要去搵返佢，於是周圍搵，去到好偏辟既地方搵，終於搵到。Fred想同返Tabby McTat一齊，但係Tabby McTat有老婆，於是佢個仔Samuel Sprat就跟佐佢Fred，繼續一齊表演搵食。（完）
我一直都稔住會有小朋友扮貓，又或者會有布偶貓。點知成場音樂劇得兩男一女。其中一個男人戴住頂帽，上面有好兩隻好細既貓耳仔，無化妝。我前面有個3歲左右既小女孩，頭十五分鐘不停問：貓咪呢？仲未有貓咪嘅？貓咪喺邊度？
其實咁細既小朋友，真係有啲難理解嗰隻就係Tabby McTat。同埋三個演員仲成日要扮唔同角色，唔好話小朋友，我都覺得有少少亂。
開頭半個鐘氣氛唔錯，叫小朋友一齊起身跳舞，仲叫兩邊觀眾比賽睇下邊邊跳得好啲（當然係同奬門人一樣 — 打和。）到後來追賊，仲追到入觀眾席。小朋友都好興奮。但過佐頭半個鐘，小朋友開始集中唔到精神，間唔中都有小朋友問：仲有幾耐，幾時返屋企。同埋個故事真係拖得有啲長，我都有小小想快啲做完。
不過，同小朋友睇音樂劇其實都幾有趣，啲反應好真實：Fred追賊跌親有個細路爆喊；成班演員瞓喺地睇星時幾個細路大叫：wake up! wake up! 臨尾有汽球昇起有小朋友問：邊個既生日會啊？
個劇團都有做少少本地化，好似話Tabby McTat去faraway place搵Fred，另一個演員話：Kowloon（雖然應該係New Territories啱啲），同埋睇星既時候講講下shooting star 亂入佐個Star Ferry。如果佢做埋個地頭俾大媽搶佐就真係本地化嘞。
帶小朋友入場睇都係一個唔錯既經歷，因為都幾多互動。不過，一張飛要成$390，如果爸爸媽媽同小朋友一齊睇，已經要$1,170。呢啲咁有趣既經驗，都唔係一般家庭負擔得到，稔起黎，唔好話音樂劇，我一家人連一齊入戲院睇戲都無試過。
