琴日係香港升旗隊總會賣旗日，千叮萬囑家人唔好買旗，一來唔想「捐錢」俾呢個組織，二來亦唔想見到張旗篤眼篤鼻。
點知晚上上facebook，見到一位朋友帶住個讀緊K2既仔，著住整齊既升旗隊制服賣旗。仔仔十分可愛，自然吸引到好多人幫襯。
我見到張旗上面印住
以國為榮 為國爭光 賣旗日
真係睇到都眼火爆。
呢啲有晒大水喉既政治團體，仲好意思霸賣旗日？賣旗日對佢哋嚟講只係宣傳，有乜好榮有乜好光？好多真慈善團體真係要靠賣旗日支持日常開支就係因為呢啲根本唔志至既「慈善團體」霸住啲期抽唔到賣旗。
仲要搵細路笨，話有得計「義工時數」，升小一有用……最慘係好多家長為佐砌靚個portfolio，口裏說唔buy升旗隊，身體卻很誠實咁推小朋友去賣旗同加入升旗隊。身教？who cares。最緊要入到好既小學。
黑色幽默，琴日咁啱係小一放榜。
見到啲入到第一志願既家長樂極忘形胡說八道，又話送手提電話奬小朋友又話擺十圍，只係好彩咋，奬乜嘢啊？我哋成日話教小朋友最唔好就係奬一啲佢哋無法控制既嘢。你細細哋食餐Ｍ記都話當開心下吖？送手機擺十圍咁大？小朋友會點稔？
至於悲從中來嗰班，我鄧班仔慘。你咁既表情，你個小朋友雖然只得六歲人仔，但係佢都會知道係自己搞到爸爸媽媽咁唔開心，仲要係一啲佢都控制唔到既嘢。佢都會有壓力。而且，如果叩門失敗，你叫小朋友用乜心情去返學？真係情何以堪。
我仲記得當年有個仔，見佐十幾間小學，間中無端端喊。有次我趁有少少時間，問佢做乜喊，佢話因為無小學收佢，爸爸媽媽成日嘈交，佢好驚。佢好想快啲入到一間好既小學，唔想再聽到爸爸媽媽嘈交。我同老師傾，叫家長同小朋友傾下。後來聽返老師講，老師話小朋友父母其實本身有其他問題，不過小朋友點明吖，以為係因為自己所以父母成日嗌交。叫媽媽同小朋友解釋下，點知媽媽覺得佢識驚先會認真啲面試……對住呢啲家長，講乜嘢小朋友太大壓力可能會有情緒病係無用架，一句「不過佢咁驚咁緊張，面試都會失水準嗰喎」先有用。
六月第一個星期，好難受。琴日見到一班小朋友去賣啲咁既旗，過兩日去維園點蠟燭，再過兩日又要去畢業典禮睇小朋友升旗，再過兩日仲要去反送中。
其實忙到嘔都要去反送中，明明知做乜都無用，都只係希望香港既小朋友唔好咁慘咋。
