上次講爆喊既學生，佢最後並無自尋短見：我喺Final見到佢，佢考得都唔錯。雖然佢零分佐一份功課，最後佢都有B+既。
我唔肯定佢最後有無得攞奬學金，但我好肯定佢E我同我老細E到好低分——全部area都俾0分，啲comment仲要勁harsh。點解我知？因為我上堂教得都唔算差，學生大部份都俾接近滿分我，無啦啦得一條友全部0，咁唔係佢仲有邊個先？
(E：即係做Course evaluation，但係你無乜幾何會聽到local講Course evaluation，通常都就咁叫E，有陣時會叫Course E)
所以，捉抄功課我哋除佐做多佐嘢之外，仲要硬食俾人E爆既代價，好慘。亦都係因為咁，有啲人係隻眼開隻眼閉唔捉既。
咁點解我哋都仲要捉呢？其實都係為學生好，唔係佢以為無後果去到寫thesis出paper先俾人捉就返唔到轉頭架啦。如果只係一份功課，我哋好少會去到紀律委員會既層面既。如果一上到紀律委員會，咁個結果就會落transcript，一世架，個學生應該會無機會報graduate school。
（以前紀律委員會主要係處理抄功課啊，出貓啊，假醫生紙之類既問題，依家？真係免得過都唔想搵佢哋。）
講返另一單「傳奇」抄功課事件。今次呢科係我真正既老細教既：即係佢除佐係教我做tutor嗰科之外，佢仲係我讀博士既導師……跟真正既老細壓力就自然更大。
嗰科去到學期未收功課時，我見到turnitin（大學用黎查有無抄功課既系統）有個學生份功課係99%抄其他嘢。咁我睇下乜料啦，原來佢同舊年既一份功課一模一樣，除佐自己個名。
係，佢連UID都同舊年嗰份功課一模一樣，即係佢求其到搵佐份source之後淨係改佐自己個名就算數！
呢啲咁明顯既抄功課case，證據確鑿，咁通常就唔駛我哋跟，直接交俾負責嗰科既同事同學生講就算數，因為正常既學生都知無討價還價既空間架啦。同埋，我老細係大學高層，所以正常既學生喺呢個情況都唔會想搵佢，費事有乜壞印象。有啲學生想唔認，我哋係會溫馨提示：「你一科功課零分，好過俾佢認得你抄功課啊……」咁通常學生就唔會糾纏落去.
點知，有一日我收到負責嗰科既同事留言（因為我同緊小朋友收Data，係唔會開電話既)：「喂，你嗰班有未有個學生９９％抄功課既，我同佢傾完，佢竟然直接寫email俾你老細話自己只係唔小心交錯佐喎，話我唔信佢唔小心啊，你知你老細架啦，佢話要約個學生傾下，仲話要搵埋你喎。嗱我通知你一聲等你收到佢電話唔好嚇親。」
呢個同事真心好人，太了解博士生喺來電顯示見到老細電話真係會心都離一離架。
過無幾耐，我就收到老細電話，老細就用佢一貫既氣定神閒同我講呢單嘢，話「雖然99%一樣，咁都要俾個機會佢解釋下點解佢唔係抄功課既。」
我：「咁其實唔需要我吖，我依家日日都喺幼稚園收緊data啊。」（更主要原因其實係我爭佢好多嘢逃避緊佢。）
老細：「咁你係佢個tutor，黎埋好啲……」
老細講到咁，唔返都唔得。
於是，嗰日我就同老細一齊見呢位「不正常學生」。咁見個學生之前，我老細就叫我睇下個學生send俾佢個email，仲attached佐一份功課。我望一望個modified date，根本就係send email俾我老細嗰日，即係我哋捉佐佢抄功課之後既事。我同老細講應該係講大話多。（其實就算唔係大話，即係個學生份功課真係一早做佐，只係交錯。我估我哋都係唔會接受既居多，雖然我唔知我老細點稔。）
不正常學生一入黎就認自己係upload 錯，話接受扣分，但係佢真係有自己做一份……
老細：「咁啊，你點解會有舊年學生既功課啊？」
不正常學生：「我係用黎跟啲formatting，我唔會咁白痴連UID都唔改，我真係唔係稔住交呢份架。」
（我心稔，乜鬼嘢藉口黎架？你當我老細係白痴就真。你梗係未死過啦。）
老細好而不捨咁追問：「有乜formatting啊？」「其實都係一份word，點解要用一份舊既功課先？」「唔係喎，你講下有乜formatting吖……」
老細無限loop之後，不正常學生終於放棄：「咁我都係想參考下其他人點答，但係我真係稔住係參考，好多人都會架啦，參考無問題架喎。」
（喺一旁食花生睇戲既我，心稔，好心你就快啲認佐佢啦，你唔會夠我老細講架。）
