繼續講姓名。今次唔係改壞名，而係有兩種字出現喺個名會較難認。第一種係依家已經好少用既字，第二種個字都叫常用，但通常唔會單獨出現，大家平時認開都係以詞語形式去記，所以要多啲時間先可以load到個讀音。例如，你見到「鴛」字，你可能會先稔「鴛鴦」，再讀「冤」。
於是，做畢業禮司儀，其中一個大工程係我要將所有唔常見既字放返個常見既音入去，以免唔小心load錯。以下係常見陷阱：
延 VS 廷； 桓 VS 恒；鋺 VS 婉；杺 VS 沁；楓 VS 嵐；婧 VS 靖
全部改返用然/停；緩/恆；冤/丸；心/滲；風/男；靜/靜
妤 VS 好；浩 VS 活；旻 VS 昱
呢個係字形問題，你試下font size 10 標階體，真係好易睇錯。
旻 昱 勗 昊 昦 暠
你知唔知點讀？文，郁，郁，浩，浩，浩。我喺去小學同幼稚園收data之前，從來無見過呢啲字 — 我哋嗰個年代好似唔多見用呢幾個字做名，但係呢幾年好似越嚟越多小朋友用⋯⋯
講開昊，一定要提下號字既朋友
包括有：灝 顥 皞 澔 皜 皓 浩 悎 鎬 淏 昊 昦 暠
而郁字就有唔少古怪既朋友：彧 頊 昱 煜
彧，我第一次見既時候，仲以為係或字，不過自己眼花。
頊昱，仲有煜，都係讀郁；但係煜又可以讀入，所以要問返老師其實家長想點讀。
不過，郁字都有啲正常啲既朋友：旭，毓。
不過昊同昱，都唔夠㬢字多朋友
希 唏 晞 睎 稀 桸 琋 郗 熙 熹 禧 僖 曦 爔 羲⋯⋯你去幼稚園叫「熙熙」，實有幾個細路應你。呢幾年真係好多熙，我甚至相信係中文名字之首。（對應既英文名就係Heilay同Hayden，講起den，真係有好多男仔叫-den，唔係我哋個年代好興既Gordon喎，係Aiden, Brayden, Claydeon, Crayden, Hayden, Jayden, Kayden…）
號，旭，熙呢三種名，我成日懷疑啲家長係稔佐個音，之後去粵語審音配詞字庫搵個少人用啲既字，所以先出現咁多版本。
以上只係常見陷阱，有好多唔常見既都無寫出嚟。為佐唔好讀錯啲小朋友名，我用成個鐘先搞掂晒嗰六百個名⋯⋯特別鳴謝粵語審音配詞字庫。
