由讀科大到做Big 4，都係過住被chur爆既生活，成日嚴重唔夠瞓，練成想瞓就瞓，唔想瞓都會瞓佐既特技。
有晚十一點幾，喺公司揼code趕工，好想快啲對到個客條數，趕尾班車返屋企。喺我聚精會神咁思考點寫，忽然後面有人好大聲講嘢，我扭大個耳筒既音量，繼續集中精神寫code，後面嗰個人越黎越大聲，根本就做唔到嘢。
我心裹面爆佐幾句粗，同時寫多幾句code⋯⋯
條友真係太嘈！實在頂唔順，決定睇下係邊個咁嘈，於是轉身⋯⋯
見到一個男人，同時聽到叫聲：「小姐！起身啊！」
忽然發現周圍暗佐好多，面前部電腦無佐，再發現自己喺巴士入面，周圍一個乘客都無，司機鬆了一口氣地看著終於起身既我：「好彩，我叫佐你好耐架啦，幾驚你係暈佐啊。」
讀科大時，有架298巴士，科大同藍田係總站，於是搵佐幾份補習喺麗港城，貪搵外快之餘仲可以趁搭車補眠。
有次補完習，趕返大學開會，臨上車同學TN打黎問我仲有幾耐返到，我話四十分鐘左右，之後一上車就瞓佐⋯⋯
然後，有人拍我：「同學，你喺咪要落車啊？」
我望一望外面，見到係科大，講聲唔該行落車。
一落車，電話響，見到係TN打黎，右上角仲有十幾個miss call，心稔點解咁多miss call：「我行緊嚟啦，十分鐘到。」
TN：「搞乜啊，打佐十幾次俾你都唔聽。」
我：「原來係你哋，做乜打十幾次啫？都話四十分鐘左右返到咯。」
TN：「但係依家已經差唔多三個鐘⋯⋯」
我望下隻錶，已經差唔多十二點！即係我來來回回搭佐五或者七程！好彩個同學拍醒我，唔係分分鐘我喺藍田巴士站瞓過夜。
（好彩我無試過瞓過夜，不過，有個住香港仔既同事試過。話說佢喺上層瞓到第二朝先起身，於是行落下層問司機：「依家喺邊度啊？」嚇到個司機大叫，原來架巴士喺車廠開出，去緊總站接客，所以唔應該有乘客，而且仲啱啱經過香港仔華人永遠墳場⋯⋯）
由彩虹搭小巴返科大，好眼瞓，但係因為上科大既路程好多急彎，當年又未有安全帶，於是我睇小說嘗試趕走睡魔⋯⋯
忽然呯一聲，我張開眼，水平咁見到一個空位，空位上面係我個就跌落地既書包；我雙手揸住本書，抬頭見到本身坐我隔離既乘客低頭望住我，緊張道：「你無事吖嘛？司機你揸慢少少先，有人飛佐出位。」
唔，我應該係坐佐落地，但係又好似唔係好掂到地，㩒唔到地面借力起身，低頭一看，先發現自己跌佐落去樓梯級，背貼小巴門，對腳「掠」佐喺小巴既地面，成個人凌空咁卡住佐，如下圖示：
