我間學校位於一個唔係太安全既地區：除佐最近有一單一家幾口俾人入屋殺死晒之外，每年都有幾個老師俾人搶嘢，間唔中校長都會電郵全校職員話收到警察指示，叫大家留意有無「可疑人物」喺附近徘徊，因為啲仔或者啲仔既家長可能喺出面得罪人等等。所以，太夜離開學校真係會有少少驚。依家四點個天就黑晒，所以成日放學都係急急腳咁走好驚俾人搶嘢。
（講開可疑人物，我其實好想知到底點先叫可疑人物，學校可唔可以提供少少培訓呢？）
除過校外有人搶嘢有可疑人物有少少危險，返佐一年工，我都間唔中都聽到學生既暴力事件。好似最近聖誕假之前，有個學生發脾氣瘋狂踢學校正門既強化玻璃門，連門都踢到爆佐仲要報警因為學校老師都搞唔掂，而我當時喺一樓，只係聽到「呯呯聲」同見到一啲男體育老師衝落下面幫手。聽聞要家長賠返幾千鎊整返度門，不過度門到依家都未整返好，唔知係學校無錢定家長唔肯貼錢。
我亦都有聽過有中二情緒有問題既女學生帶刀返學想隊同學報復，好彩有老師係佢行動前見到佢有少少可疑所以搜佢身。不過呢啲咁危險既事一年都應該係得幾次掛。
而我最常聽到既都係打交，包括隻揪同圍毆。
喺我咁短既教學生涯，聽過最誇張嗰次係三個女仔：兩個中六女仔喺馬路邊圍住一個中七女仔打，打到出馬路，拳拳到肉同趕扯頭髮，基本係上喺兩個中六女仔（手禁）住個中七女仔黎打，個中七女仔根本無得還手；佢哋旁邊仲不停有車經過，超級危險。旁邊仲有啲學生喺度叫。
放心，我唔在場，我知只係因為呢單嘢俾人拍佐片放上tiktok，校長喺教職員早會播片，所以我咁有印象。據聞係其中一個中六女仔，話個中七女仔搶佐佢男朋友，於是搵埋佢個bestie一齊去講數，結果講唔掂數打交收場。
斷估唔到年廿九，第一次親眼見到打交，仲焗住要幫手制止。
當時係第三堂轉第四堂，我哋轉堂時間只有五分鐘，通常大家都會直接趕去下一個課室。不過，嗰日實在太凍，我走佐落教員室裝熱水，然後急步行返上一樓，因為已經差唔多轉完堂，要開始上堂，所以樓梯基本上係無人。
我開始聽到越黎越大聲既「呯」「呯」聲。
一轉角，就見到兩個人扭作一團，喺到打交。望真啲，喺兩個男仔，佢哋唔係玩玩下嗰種打交（我成日都見到啲玩玩下既推黎推去），而係堅揼同扯頭髮咁——其中一個學生係梳好似馬勒當拿咁既頭，所以好好扯。
我真係呆佐……
因為我咁大個人都無試過喺現場見人打交啊……
馬勒當拿頭男仔高我成個頭，佢流緊鼻血，俾一個同我差唔多高既男仔迫埋樓梯既牆角狂打。佢哋拳拳到肉，仲好似起埋腳。
我講好似，係因為我真係嚇呆佐，我其實都唔太肯定佢哋有無起腳。當時，我完全唔知可以做乜，佢哋真係打得好狠，好似動物咁。唔好話出手阻止，我根本唔敢企埋去，正所謂拳腳無眼，俾佢哋打中都小事，我個位…
